സിബിഎസ്ഇ-യുടെ 2026-ലെ പ്ലസ് ടു റിസല്‍ട്ട് സര്‍വ്വത്ര ആശയക്കുഴപ്പവും ആശങ്കയും സൃഷ്ടിച്ചിരിക്കുകയാണ്. സിബിഎസ്ഇ വേണ്ടത്ര മുന്നൊരുക്കള്‍ ഇല്ലാതെ കൊണ്ടുവന്ന മൂല്യനിര്‍ണയ രീതിയായ ഓണ്‍ സ്‌ക്രീന്‍ മാര്‍ക്കിംഗ് (ഒഎസ്എം) പാടെ പരാജയപ്പെട്ടു എന്നു മാത്രമല്ല, വിദ്യാര്‍ത്ഥികളുടെ ഭാവി തുലാസിലാക്കുകയും ചെയ്തു. 

കൈകഴുകുന്ന സര്‍ക്കാര്‍

ഒടുവില്‍ 20 ദിവസങ്ങള്‍ക്കുശേഷം സിബിഎസ്ഇ ചെയര്‍മാന്റെയും സെക്രട്ടറിയുടെയും പേരില്‍ പേരിനൊരു നടപടിയെടുത്ത് ജനങ്ങളുടെ കണ്ണില്‍ പൊടിയിട്ട് കേന്ദ്ര സര്‍ക്കാര്‍ ഏതാണ്ട് കൈകഴുകി. അന്വേഷണത്തിന് ഒരു ഏകാംഗ കമ്മീഷനെയും വച്ചിട്ടുണ്ട്. ചെയര്‍മാനെയും സെക്രട്ടറിയേയും സസ്‌പെന്‍ഡു ചെയ്യുകയോ പുറത്താക്കുകയോ അല്ല ചെയ്തിരിക്കുന്നത്. മറിച്ച്, ഒരു ചെറിയ സ്ഥലംമാറ്റം. പറയുമ്പോള്‍ വലിയ നടപടിയാണ്. ഗവണ്‍മെന്റ് ഉദ്യോഗസ്ഥന്മാര്‍ക്ക് സ്ഥലംമാറ്റം അല്ലെങ്കിലും പതിവുളളതല്ലേ?

ഞെട്ടിപ്പിച്ച ഉത്തരക്കടലാസുകള്‍ 

സിബിഎസ്ഇയുടെ തെറ്റിപ്പോയ പരിഷ്‌ക്കാരത്തിന്റെ വീഴ്ചകള്‍ അനുഭവിക്കേണ്ടിവന്നിരിക്കുന്നത് പരീക്ഷ എഴുതിയ വിദ്യാര്‍ത്ഥികളാണ്. മാര്‍ക്ക് ലിസ്റ്റിന്റെ കോപ്പികള്‍ക്ക് അപേക്ഷിച്ച വിദ്യാര്‍ത്ഥികള്‍ക്ക് അതു ലഭിച്ചപ്പോള്‍ സ്വന്തം ഉത്തരപേപ്പറുകള്‍ പലരും കണ്ട് ഞെട്ടി. ചിലതൊന്നും വായിക്കാന്‍പോലും കഴിയുന്നതായിരുന്നില്ല. ചിലര്‍ക്ക് മറ്റാരുടെയൊക്കെയോ ആണ് ലഭിച്ചത്. ചില ഉത്തരക്കടലാസുകളില്‍നിന്ന് പല പേജുകളും അപ്രത്യക്ഷമായിരിക്കുന്നു. സ്‌കാന്‍ ചെയ്തപ്പോള്‍ വന്ന പിഴവായിരുന്നത്. അതു നോക്കി മാര്‍ക്കിട്ടാല്‍ ഇതിലും വലിയ അബദ്ധങ്ങള്‍ സംഭവിക്കും. 

അത്തരം പരാതികള്‍ വ്യാപകമായപ്പോള്‍ മുഖംരക്ഷിക്കുന്നതിനായി സിബിഎസ്ഇ അപേക്ഷിക്കാനുള്ള വെബ്‌സൈറ്റുതന്നെ തകരാറിലാക്കി. ഒരുപക്ഷേ, മാധ്യമ വാര്‍ത്തകള്‍ വന്നതുകൊണ്ടുള്ള നാണക്കേടുകൊണ്ടായിരിക്കാം. അന്നുവരെ എല്ലാം ഭദ്രമാണെന്നു അവകാശപ്പെട്ടിരുന്നവരാണ്. 

കീം പ്രതിസന്ധിയിലോ?

യഥാര്‍ത്ഥത്തില്‍ നഷ്ടം സംഭവിച്ചിരിക്കുന്നത് വിദ്യാര്‍ത്ഥികള്‍ക്കുമാത്രമാണ്. ഉന്നത പഠനത്തിനുള്ള അഡ്മിഷന്റെ മാനദണ്ഡം  പ്ലസ് ടു മാര്‍ക്കാണ്. ഉദാഹരണത്തിന് കേരളത്തിലെ എഞ്ചിനീയറിംഗിന് പ്രവേശന പരീക്ഷയായ കീമിന്റെ റാങ്ക് ലിസ്റ്റ് തയാറാക്കുന്നത് എന്‍ട്രന്‍സിന്റെ സ്‌കോറും പ്ലസ് ടു പരീക്ഷയിലെ മാത്തമാറ്റിക്‌സ്, ഫിസിക്‌സ്, കെമിസ്ട്രി എന്നീ വിഷയങ്ങള്‍ക്ക് ലഭിച്ച മാര്‍ക്കും 50:50 എന്ന അനുപാതത്തില്‍ പരിഗണിച്ചാണ്. ആര്‍ക്കിടെക്ചര്‍ കോഴ്‌സിന്റെ റാങ്ക് ലിസ്റ്റ് തയ്യാറാക്കുന്നതില്‍ 50 ശതമാനം പ്ലസ് ടു മാര്‍ക്കാണ്. 

ഒളിച്ചോട്ടം പരിഹാരമല്ല

നോക്കൂ, പേപ്പര്‍ തെളിയാതെ വന്നതുകൊണ്ടോ,  ഉത്തരക്കടലാസുകളുടെ പേജുകള്‍ കാണാതെ പോയതുകൊണ്ടോ മാര്‍ക്കുകള്‍ കുറഞ്ഞാല്‍ എഞ്ചിനീയറിംഗ് റാങ്ക് ലിസ്റ്റുകളില്‍നിന്നും അവര്‍ പുറത്താകും. ഉത്തരക്കടലാസ് വാല്യൂവേഷനുമായി ബന്ധപ്പെട്ട് പല വിധത്തിലുള്ള അഴിമതിക്കഥകള്‍ ഇപ്പോള്‍ നാട്ടില്‍ പ്രചരിക്കുന്നുണ്ട്. അത് എന്തുതന്നെയാണെങ്കിലും വിദ്യാര്‍ത്ഥികളുടെ പ്രശ്‌നം എങ്ങനെ പരിഹരിക്കുന്ന വിധത്തിലുള്ള ഇടപെടലുകളാണ് കേന്ദ്ര സര്‍ക്കാരിന്റെ ഭാഗത്തുനിന്നും ഉടന്‍ ഉണ്ടാകേണ്ടത്.

സിബിഎസ്ഇ ചെയര്‍മാനെയോ, സെക്രട്ടറിയോ ഒക്കെ സ്ഥലം മാറ്റി മുഖംരക്ഷിച്ചോളൂ. അതിന്റെ മറവില്‍ കേന്ദ്ര ഗവണ്‍മെന്റ് ഉത്തരവാദിത്വത്തില്‍നിന്നും ഒളിച്ചോടരുത്. കഠിനാധ്വാനം ചെയ്ത വിദ്യാര്‍ത്ഥികളോടു രാജ്യത്തിന് ഉത്തരവാദിത്വമുണ്ട്. അവര്‍ക്ക് അര്‍ഹതപ്പെട്ട അവസരം നഷ്ടപ്പെടാതെ അക്കാദമിക് വിദഗ്ധരെ ഉള്‍പ്പെടുത്തി പ്രശ്‌നം പരിഹരിക്കണം. അങ്ങനെയുള്ള ശക്തമായ ഇടപെടലുകളാണ് ഭരണനേതൃത്വത്തില്‍നിന്നും ഉണ്ടാകേണ്ടത്. ഭാവിയില്‍ ഇത്തരം പ്രശ്‌നങ്ങള്‍ ഉണ്ടാകാതിരിക്കാനുള്ള കര്‍ശന നടപടികളും സ്വീകരിക്കണം. 

ജോസഫ് മൈക്കിള്‍