റോം: യേശുക്രിസ്തുവിന്റെ ജീവിതം പ്രമേയമാക്കിയ ‘ദി ചോസണ്‍’ ലോകത്ത് ഏറ്റവും കൂടുതല്‍ ഭാഷകളിലേക്ക് വിവര്‍ത്തനം ചെയ്യപ്പെട്ട ടെലിവിഷന്‍ പരമ്പര എന്ന ഗിന്നസ് വേള്‍ഡ് റെക്കോര്‍ഡ് തിരുത്തിക്കുറിച്ചു. ഈ പരമ്പരയുടെ ആദ്യ സീസണ്‍ ഇപ്പോള്‍ 125 ഭാഷകളില്‍ ലഭ്യമാണ്. 2025 സെപ്റ്റംബറില്‍ നേടിയ 86 ഭാഷകളിലേക്ക് വിവര്‍ത്തനം ചെയ്യപ്പെട്ടതിന്റെ റെക്കോര്‍ഡാണ് ഏതാനും മാസങ്ങള്‍ക്കുള്ളില്‍ തിരുത്തപ്പെട്ടത്. ഈ പരമ്പരയുടെ നിര്‍മാതാക്കള്‍ക്കും അഭിനേതാക്കള്‍ക്കുമൊപ്പം ആയിരക്കണക്കിന് ആരാധകരും പങ്കെടുത്ത ചോസണ്‍കോണ്‍ എന്ന അന്താരാഷ്ട്ര കൂട്ടായ്മയില്‍ ഇത് സംബന്ധിച്ച പ്രഖ്യാപനം നടന്നു.

വന്‍കിട മീഡിയ കമ്പനികളെപ്പോലും അമ്പരപ്പിക്കുന്ന വളര്‍ച്ചയാണ് അന്താരാഷ്ട്ര തലത്തില്‍ ‘ദി ചോസണ്‍’കൈവരിച്ചിരിക്കുന്നത്. 2017-ല്‍ ആരംഭിച്ച ഈ പരമ്പരക്ക് 175 രാജ്യങ്ങളിലായി 28 കോടിയിലധികം പ്രേക്ഷകരുണ്ട്. 600 ഭാഷകളിലേക്ക് ‘ദി ചോസണ്‍’ വിവര്‍ത്തനം ചെയ്യുവാനും ഡബ് ചെയ്യുവാനുമാണ് ലക്ഷ്യമിടുന്നതെന്ന് പരമ്പരയുടെ നിര്‍മാണത്തിനും വിതരണത്തിനും നേതൃത്വം നല്‍കുന്ന എന്‍ജിഒ -യായ ‘കം ആന്‍ സീ’യുടെ ചീഫ് എക്സിക്ക്യൂട്ടീവ് ജയിംസ് ബാര്‍ണറ്റ് പറഞ്ഞു. കൂടുതല്‍ ഭാഷകളിലേക്ക് വിവര്‍ത്തനം ചെയ്യുക എന്നതിനപ്പുറം മനുഷ്യര്‍ ചിന്തിക്കുന്നതും സ്വപ്നം കാണുന്നതും പ്രാര്‍ഥിക്കുന്നതുമായ  ഭാഷയില്‍ തന്നെ യേശുവിന്റെ കഥ അവര്‍ക്ക് അനുഭവവേദ്യമാകണമെന്ന  ലക്ഷ്യമാണ് ഇതിന് പിന്നിലുള്ളതെന്ന് ജയിംസ് വ്യക്തമാക്കി.