ഇസ്രായേല്‍ ജനത്തോട് ദൈവം പറഞ്ഞ വാക്കുകള്‍ ഉദ്ധരിച്ചുകൊണ്ട് വൈദികര്‍ വിശുദ്ധജീവിതം നയിക്കുന്നതില്‍ യാതൊരു വിട്ടുവീഴ്ചയും ചെയ്യരുതെന്ന ഓര്‍മപ്പെടുത്തലുമായി ലിയോ 14-ാമന്‍ പാപ്പ. ഈശോയുടെ തിരുഹൃദയ തിരുനാള്‍ ദിനത്തില്‍ ആചരിക്കുന്ന ‘വൈദികരുടെ വിശുദ്ധീകരണത്തിനായുള്ള പ്രാര്‍ത്ഥനാ ദിന’ത്തോടനുബന്ധിച്ച് നല്‍കിയ സന്ദേശത്തില്‍, ‘നിങ്ങളുടെ ദൈവമായ കര്‍ത്താവായ ഞാന്‍ വിശുദ്ധനായിരിക്കുന്നതുപോലെ നിങ്ങളും വിശുദ്ധരായിരിക്കുവിന്‍'(ലേവ്യര്‍ 19:2; 1 പത്രോസ് 1:16) എന്ന ദൈവത്തിന്റെ ആഹ്വാനം പാപ്പ വൈദികരോട് പങ്കുവച്ചു.

സ്വര്‍ഗീയമായ ഈ ആഹ്വാനം യുഗങ്ങളിലൂടെ ഇന്നും പ്രതിധ്വനിച്ചുകൊണ്ടിരിക്കുകയാണെന്ന് പാപ്പ കുറിച്ചു. ‘ഇന്നും അത് ഓരോ വിശ്വാസിയിലും, പ്രത്യേകിച്ച് നമ്മള്‍ വൈദികരില്‍ ശക്തമായി മുഴങ്ങിക്കേള്‍ക്കുന്നു. വിശുദ്ധിയെന്നത് പല ഓപ്ഷനുകളില്‍ ഒന്നോ അല്ലെങ്കില്‍ അമൂര്‍ത്തമായ ആശയമോ അല്ല. മറിച്ച് ഉത്ഥിതനായ ക്രിസ്തുവിേെനാടൊപ്പം സ്വര്‍ഗസൗഭാഗ്യത്തില്‍ പങ്കുചേരാന്‍ ആഗ്രഹിക്കുന്ന ഓരോ വ്യക്തിയുടെയും സ്വത്വത്തിന്റെ ഭാഗമാണ് വിശുദ്ധി,’ പാപ്പ വിശദീകരിച്ചു.

വിശുദ്ധി എന്നത് ക്രിസ്തുവിന്റെ രഹസ്യത്തിലുള്ള പങ്കുചേരലും, കൂട്ടായ്മയിലേക്കുള്ള ഒരു തീര്‍ത്ഥാടനവുമാണ്. ക്രിസ്തുവിന്റെ കുത്തിത്തുറക്കപ്പെട്ട തിരുഹൃദയത്തിന് മുന്നില്‍ ‘ഇതാ ഞാന്‍’ എന്ന സമര്‍പ്പണം ഓരോ ദിവസവും പുതുക്കുവാന്‍ പാപ്പ വൈദികരോട് അഭ്യര്‍ത്ഥിച്ചു. ക്രിസ്തു തന്റെ ജനത്തെ എത്രമാത്രം സ്‌നേഹിച്ചുവോ, അതേ സ്‌നേഹത്തോടെ അവിടുത്തെ ജനത്തെ സ്‌നേഹിക്കാന്‍ നിങ്ങളെത്തന്നെ പൂര്‍ണമായി അവിടുത്തേക്ക് വിട്ടുകൊടുക്കുവാന്‍ അതിലൂടെ സാധിക്കുമെന്ന് പാപ്പ പറഞ്ഞു.

‘പൗരോഹിത്യം എന്നത് ഈശോയുടെ തിരുഹൃദയത്തിന്റെ സ്‌നേഹമാണ്’ എന്ന ആര്‍സിലെ വിശുദ്ധ ജോണ്‍ മരിയ വിയാനിയുടെ വാക്കുകള്‍ പാപ്പ വൈദികരെ ഓര്‍മിപ്പിച്ചു. നമ്മള്‍ പൂര്‍ണമായി കീഴടങ്ങുകയും നമ്മെത്തന്നെ സമര്‍പ്പിക്കുകയും ചെയ്താല്‍, നമ്മില്‍ നിന്ന് ഒന്നും നഷ്ടപ്പെട്ടുപോകില്ല എന്നതിന്റെ ഉറപ്പും വാഗ്ദാനവുമാണ് ഈ സ്‌നേഹമെന്ന് പാപ്പ കൂട്ടിച്ചേര്‍ത്തു. വൈദികരുടെ മാതാവായ പരിശുദ്ധ കന്യകാമറിയത്തിന് എല്ലാ വൈദികരെയും ഭരമേല്‍പ്പിച്ചുകൊണ്ടാണ് പാപ്പയുടെ സന്ദേശം അവസാനിക്കുന്നത്.