തൃശൂര്: സംഗീതം മനുഷ്യ മനസ്സുകളെ ദൈവവുമായി അടുപ്പിക്കുമെന്നും അതൊടൊപ്പം മനുഷ്യബന്ധങ്ങളെ കൂട്ടിയിണക്കുമെന്നും ഉപരാഷ്ട്രപതി സി.പി. രാധാകൃഷ്ണന് പറഞ്ഞു.
രാജ്യത്തെ ആദ്യ സംരംഭമായ അന്തര്ദേശീയ ഗാനാശ്രമത്തിന്റെ ശിലാസ്ഥാപനം തൃശൂരിലെ നടത്തറയില് നിര്വ്വഹിച്ച് പ്രസംഗിക്കുകയായിരുന്നു അദ്ദേഹം.
സി.എം.ഐ. സഭയുടെ കീഴിലുള്ള കെസിന്റെ (KESS) നേതൃത്വത്തില് ചേതനയുമായി സഹകരിച്ചാണ് ഈ പ്രസ്ഥാനത്തിന് തുടക്കമിടുന്നത്.
എല്ലാ വിശ്വാസങ്ങളെയും ഒരുമിച്ച് കൊണ്ടുപോകാന് സംഗീതത്തിന് ശക്തിയുണ്ട്. ശാന്തമായൊരു രാഗത്തിന് മനുഷ്യ മനസിലെ ഉത്കണ്ഠയെ ശമിപ്പിക്കാനാകും. അതുകൊണ്ടാണ് ഭക്തിഗാനങ്ങള് ഹൃദയ സ്പര്ശിയായി അനുഭവപ്പെടുന്നതെന്നും അദ്ദേഹം പറഞ്ഞു.
ഗവര്ണര് രാജേന്ദ്ര വിശ്വനാഥ് അര്ലേക്കര്, കേന്ദ്രമന്ത്രി സുരേഷ് ഗോപി, ആര്ച്ച് ബിഷപ്പ് മാര് ആന്ഡ്രൂസ് താഴത്ത്, പ്രൊവിന്ഷ്യല് ഫാ. ഡോ. ജോസ് നന്തിക്കര, ഫാ. ഡോ. പോള് പൂവ്വത്തിങ്കല് എന്നിവര് പ്രസംഗിച്ചു.
പത്മവിഭൂഷണ് കെ.ജെ. യേശുദാസ് ഓണ്ലൈനിലൂടെ ആശംസകള് നേര്ന്നു. മേയര് ഡോ. നിജി ജസ്റ്റിന്, സ്വാമി നന്ദാത്മനന്ദ, ഓണമ്പിള്ളി മുഹമ്മദ് ഫൈസി തുടങ്ങിയവര് വേദിയില് സന്നിഹിതരായിരുന്നു.
50 ഗായകര് പങ്കെടുത്ത സ്വാഗത ഗാനാലാപനം കഴിഞ്ഞപ്പോള് ഉപരാഷ്ട്രപതി താല്പര്യമെടുത്ത് അവരോടൊപ്പം നിന്ന് ഫോട്ടോ എടുത്തു.
പി.എന്.സി. മേനോന്, നസീര് വെളിയത്ത്, ടി.എസ്. പട്ടാഭിരാമന്, ഡോ. വി.എ. ജോസഫ്, റോബിന്സണ് മൈക്കിള് എന്നിവരെ ആദരിച്ചു.
