വാഷിംഗ്ടണ്‍ ഡി.സി: യുഎസിലെ വത്തിക്കാന്റെ പുതിയ പ്രതിനിധിയായി (അപ്പസ്‌തോലിക്ക് നൂണ്‍ഷ്യോ) ആര്‍ച്ചുബിഷപ് ഗബ്രിയേല ജിയോര്‍ഡാനോ കാച്ചയെ ലിയോ 14-ാമന്‍ പാപ്പ നിയമിച്ചു. നിലവില്‍ ന്യൂയോര്‍ക്കിലെ ഐക്യരാഷ്ട്രസഭയിലെ വത്തിക്കാന്റെ സ്ഥിരം നിരീക്ഷകനായി സേവനമനുഷ്ഠിച്ചുവരികയായിരുന്നു ആര്‍ച്ചുബിഷപ് കാച്ച.

പത്തുവര്‍ഷത്തോളം യുഎസില്‍ അപ്പസ്‌തോലിക്ക് നൂണ്‍ഷ്യോയായിരുന്ന കര്‍ദിനാള്‍ ക്രിസ്റ്റോഫ് പിയറിന് പകരക്കാരനായാണ് ആര്‍ച്ചുബിഷപ് കാച്ച എത്തുന്നത്.  ജനുവരിയില്‍ കര്‍ദിനാള്‍ പിയറിന് 80 വയസ് പൂര്‍ത്തിയായതിനെ തുടര്‍ന്നാണ് പുതിയ നിയമനം. ഇറ്റാലിയന്‍ സ്വദേശിയായ ആര്‍ച്ചുബിഷപ് കാച്ച  2019 മുതല്‍ ഐക്യരാഷ്ട്രസഭയില്‍ വത്തിക്കാന്റെ നിരീക്ഷകനായി പ്രവര്‍ത്തിച്ചുവരികയാണ്. മുമ്പ് ഫിലിപ്പീന്‍സ്, ലബനന്‍ എന്നിവിടങ്ങളിലും അദ്ദേഹം വത്തിക്കാന്‍ പ്രതിനിധിയായി സേവനമനുഷ്ഠിച്ചിട്ടുണ്ട്. ഫ്രഞ്ച് വംശജനായ കര്‍ദിനാള്‍ ക്രിസ്റ്റോഫ് പിയര്‍ 2016-മുതല്‍ അമേരിക്കയിലെ വത്തിക്കാന്‍ പ്രതിനിധിയായി സേവനമനുഷ്ഠിക്കുകയായിരുന്നു.