നൈജീരിയയിലെ കഡുന സംസ്ഥാനത്തുള്ള ക്രൈസ്തവ ഗ്രാമത്തിന് നേരെ ഉണ്ടായ ഭീകരാക്രമണത്തില് എട്ട് കുട്ടികളടക്കം കുറഞ്ഞത് 30 പേര് കൊല്ലപ്പെട്ടു. തെക്കന് കഡുനയില് സ്ഥിതി ചെയ്യുന്ന നരിഡോണ് ഗ്രാമത്തിലാണ് ഇസ്ലാമിക് ഭീകരര് എന്ന് സംശയിക്കുന്നവര് ക്രൂരമായ ആക്രമണം അഴിച്ചുവിട്ടത്.
ഞായറാഴ്ച രാത്രിയാണ് ആയുധധാരികളായ അക്രമികള് ഗ്രാമത്തിലേക്ക് ഇരച്ചുകയറിയത്. തുടര്ന്ന് ഗ്രാമവാസികള്ക്ക് നേരെ ഇവര് വെടിയുതിര്ക്കുകയും വീടുകള്ക്കും വ്യാപാരസ്ഥാപനങ്ങള്ക്കും തീയിടുകയും ചെയ്തു. മണിക്കൂറുകളോളം നീണ്ടുനിന്ന താണ്ഡവത്തില് സ്ത്രീകളും കുട്ടികളും പ്രായമായവരും കൊല്ലപ്പെട്ടു. ഗ്രാമത്തിന്റെ ഭൂരിഭാഗവും അക്രമികള് അഗ്നിക്കിരയാക്കി. ആക്രമണ വിവരം സ്ഥിരീകരിച്ച ഗ്രാമ പ്രതിനിധി ദോഗോണ് റാണ ഗുരുതരമായി പരിക്കേറ്റ നാല് പേര് ചികിത്സയിലാണെന്നും മരണസംഖ്യ ഇനിയും ഉയര്ന്നേക്കാമെന്നും പറഞ്ഞു.
ഒരു കുടുംബത്തിലെ അഞ്ച് കുട്ടികളാണ് ഒറ്റരാത്രികൊണ്ട് കൊല്ലപ്പെട്ടത്. ഈ കുടുംബത്തില് അവശേഷിച്ച ഒരേയൊരു കുട്ടി ഗുരുതരാവസ്ഥയില് ജീവന് വേണ്ടി പോരാടുകയാണ്.കൊല്ലപ്പെട്ടവരെല്ലാം ക്രൈസ്തവ സമൂഹത്തില്പ്പെട്ടവരാണെന്ന് പ്രാദേശിക ക്രൈസ്തവ നേതാക്കളും ഗ്രാമവാസികളും സ്ഥിരീകരിച്ചു. അന്തര്ദേശീയ ഇടപെടലുകള് ഉണ്ടായിട്ടും നൈജീരിയയില് ക്രൈസ്തവ ഗ്രാമങ്ങള്ക്ക് നേരെ നടക്കുന്ന അക്രമങ്ങള് അന്തമില്ലാതെ തുടരുന്ന സാഹചര്യമാണ് നിലവിലുള്ളത്. നൈജീരിയയിലെ നിസ്സഹായരായ വിശ്വാസികളുടെ സുരക്ഷയ്ക്കും അക്രമികളുടെ മാനസാന്തരത്തിനും വേണ്ടി കൂടുതല് തീക്ഷ്ണതയോടെ പ്രാര്ത്ഥിക്കാനുള്ള ഓര്മപ്പെടുത്തലാണ് അക്രമത്തിന്റെ ഒരോ വാര്ത്തകളുമെന്ന് നമുക്ക് മറക്കാതിരിക്കാം.
