വത്തിക്കാന് സിറ്റി: ‘സമഗ്ര മാനവ വികസനത്തിനായുള്ള വത്തിക്കാന് കാര്യാലയത്തിന്റെ’ പ്രീഫെക്ടായി ഇറ്റാലിയന് സാമ്പത്തിക ശാസ്ത്രജ്ഞയും സലേഷ്യന് സന്യാസിനിയുമായ സിസ്റ്റര് അലസാന്ദ്ര സ്മെറില്ലിയെ ലിയോ 14-ാമന് പാപ്പ നിയമിച്ചു. നിലവില് ഈ പദവിയിലുള്ള കര്ദിനാള് മൈക്കല് സെര്ണി വിരമിക്കുന്ന ഒഴിവിലാണ് നിയമനം.
വത്തിക്കാന്റെ ചരിത്രത്തില് ഇത് മൂന്നാം തവണയാണ് ഒരു വനിതയെ ഡിക്കാസ്റ്ററി നയിക്കാന് നിയമിക്കുന്നത്. 2021 മുതല് ഇതേ വകുപ്പിന്റെ സെക്രട്ടറിയായി സേവനമനുഷ്ഠിക്കുകയായിരുന്നു സിസ്റ്റര് അലസാന്ദ്ര സ്മെറില്ലി എഫ്എംഎ. സെപ്റ്റംബര് 1 മുതല് സിസ്റ്റര് അലസാന്ദ്രയുടെ നേതൃത്വത്തിലുള്ള സമിതി ചുമതലയേല്ക്കും. 2022 മുതല് വകുപ്പിന്റെ അണ്ടര്സെക്രട്ടറിയായി സേവനമനുഷ്ഠിക്കുന്ന കര്ദിനാള് ഫാബിയോ ബാജിയോയെ പ്രോ-പ്രീഫെക്ടായും സ്ലൊവാക്യന് വൈദികനായ ഫാ. ജോസഫ് ബാര്ലാഷിനെ സെക്രട്ടറിയായും നിയമിച്ചിട്ടുണ്ട്.
51 വയസു പ്രായമുള്ള സിസ്റ്റര് അലസാന്ദ്ര സലേഷ്യന് സന്യാസിനി സമൂഹത്തിലെ (എഫ്എംഎ) അംഗമാണ്. പൊളിറ്റിക്കല് ഇക്കോണമിയിലും സ്റ്റാറ്റിസ്റ്റിക്സിലും പ്രഫസറായ സിസ്റ്റര് വത്തിക്കാനിലെ വിവിധ സാമ്പത്തിക-സാമൂഹിക സമിതികളില് അംഗമാണ്. 2020-ല് ആഗോളതലത്തില് ശ്രദ്ധനേടിയ ‘ഇക്കോണമി ഓഫ് ഫ്രാന്സെസ്കോ’ എന്ന പരിപാടിയുടെ പ്രധാന സംഘാടകരില് ഒരാളായിരുന്നു. സ്ത്രീകളെ സഭയുടെ താക്കോല് സ്ഥാനങ്ങളില് നിയമിച്ചുകൊണ്ട് ഫ്രാന്സിസ് മാര്പാപ്പ തുടങ്ങിവെച്ച സ്ത്രീ ശാക്തീകരണ നടപടികളുടെ തുടര്ച്ചയായി ലിയോ 14-ാമന് മാര്പാപ്പനടത്തിയ ഈ നിര്ണായക നിയമനം വിലയിരുത്തപ്പെടുന്നു.
സമഗ്ര മാനവ വികസനത്തിനായുള്ള ഡിക്കാസ്റ്ററിയുടെ രൂപീകരണ സമയം മുതല് അതിന്റെ നേതൃത്വനിരയിലുള്ള ജെസ്യൂട്ട് സഭാംഗമായ കര്ദിനാള് മൈക്കല് സെര്ണി ഈ മാസം 80 വയസ് പൂര്ത്തിയാകുന്നതോടെ പദവിയില് നിന്ന് ഔദ്യോഗികമായി വിരമിക്കും. നീതി, സമാധാനം, പരിസ്ഥിതി സംരക്ഷണം, ദാരിദ്ര്യ നിര്മ്മാര്ജ്ജനം, കുടിയേറ്റക്കാരുടെ ക്ഷേമം തുടങ്ങിയ ആഗോള വിഷയങ്ങളില് കത്തോലിക്കാ സഭയുടെ സാമൂഹിക ദര്ശനങ്ങള് നടപ്പിലാക്കാന് പാപ്പയെ സഹായിക്കുന്ന കാര്യാലയമാണ് ‘സമഗ്ര മാനവ വികസനത്തിനായുള്ള ഡിക്കാസ്റ്ററി’.
