ഏഥന്സ്/ഗ്രീസ്: പുതിയതായി കണ്ടെത്തിയ നിശാശലഭത്തിന് കത്തോലിക്ക സഭയുടെ തലവനായ ലിയോ 14-ാമന് പാപ്പയുടെ പേര് നല്കി ഗവേഷകര്. മെഡിറ്ററേനിയന് ദ്വീപായ ക്രീറ്റില് നിന്ന് കണ്ടെത്തിയ പുതിയ ഇനം ശലഭത്തിന് ലിയോ 14-ാമന് പാപ്പയോടുള്ള ആദരസൂചകമായി ‘പൈറാലിസ് പാപ്പാലിയോണി’ എന്ന ശാസ്ത്രീയ നാമമാണ് നല്കിയിരിക്കുന്നത്.
പ്രമുഖ ഷഡ്പദ ശാസ്ത്രജ്ഞരായ പീറ്റര് ഹ്യൂമര്, ലൗറി കെയ്ല, ആന്ഡ്രിയാസ് എച്ച് സെഗെറര് എന്നിവരടങ്ങിയ ഗവേഷക സംഘമാണ് ഇതുമായി ബന്ധപ്പെട്ട ലേഖനം ശാസ്ത്രമാസികയായ ‘നോട്ട ലെപിഡോപ്റ്റെറോളജിക്ക’ -യില് പ്രസിദ്ധീകരിച്ചത്. പരിസ്ഥിതി സംരക്ഷണത്തിനായി ശബ്ദമുയര്ത്തുന്ന പാപ്പയെന്ന നിലയിലാണ് പാപ്പയുടെ പേര് പുതിയതായി കണ്ടെത്തിയ നിശാശലഭത്തിന് നല്കിയെതന്ന് ഗവേഷകര് പറഞ്ഞു. ‘പൈറാലിസ്’ വിഭാഗത്തില്പ്പെട്ട ശലഭങ്ങള്ക്ക് രാജകീയമായോ സഭാപരമായോ ഉള്ള പദവികളുടെ പേര് നല്കുന്ന പാരമ്പര്യവും ഈ പേര് നല്കിയതിന്റെ പിന്നില് ചൂണ്ടിക്കാണിക്കപ്പെടുന്നു.
ഏകദേശം 2 സെന്റീമീറ്റര് ചിറകളവുള്ള ഈ നിശാശലഭത്തിന് സ്വര്ണ നിറമുള്ള പുള്ളികളും വെള്ള നിറത്തിലുള്ള വരകളുമുണ്ട്. സൃഷ്ടികളുടെ വൈവിധ്യത്തിലൂടെ വെളിപ്പെടുന്ന ദൈവത്തിന്റെ കരം തിരിച്ചറിയാനും ആ വൈവിധിധ്യം സംരക്ഷിക്കാനുമുള്ള മനുഷ്യന്റെ ഉത്തരവാദിത്വത്തിന്റെ ഓര്മപ്പെടുത്തല് കൂടെയായി ലിയോ പാപ്പയുടെ പേരിലുള്ള ഈ പുതിയ നിശാശലഭം മാറുകയാണ്.
