വാഷിംഗ്ടണ് ഡിസി: യുഎസ് പ്രസിഡന്റ് ഉള്പ്പെടെയുള്ള പ്രമുഖര് പങ്കെടുത്ത വൈറ്റ് ഹൗസ് കറസ്പോണ്ടന്റ്സ് അസോസിയേഷന് ഡിന്നറിനിടെയുണ്ടായ വെടിവയ്പ്പിനെ അപലപിച്ച് യുഎസ് കത്തോലിക്കാ മെത്രാന് സമിതി. അക്രമം ഒരിക്കലും ഒന്നിനും പരിഹാരമല്ലെന്ന് യുഎസ് ബിഷപ്സ് കോണ്ഫ്രന്സ് പ്രസിഡന്റ് ആര്ച്ചുബിഷപ് പോള് കോക്ക്ലി പറഞ്ഞു. യുഎസ് പ്രസിഡന്റിനും അദ്ദേഹത്തെ സംരക്ഷിക്കുന്നവര്ക്കും പരിപാടിയില് പങ്കെടുത്ത ആര്ക്കും ഗുരുതരമായ അപകടമൊന്നും സംഭവിക്കാത്തത്തില് അദ്ദേഹം നന്ദി പ്രകടിപ്പിച്ചു. തിരഞ്ഞെടുക്കപ്പെട്ട നേതാക്കള്ക്കും ഉദ്യോഗസ്ഥര്ക്കും ദൈവാനുഗ്രഹം ലഭിക്കുന്നതിനായി പ്രാര്ത്ഥിക്കണമെന്നും ആര്ച്ചുബിഷപ് ആഹ്വാനം ചെയ്തു.
ഏപ്രില് 25-ന് വാഷിംഗ്ടണ് ഡിസിയിലെ ഹില്ട്ടണ് ഹോട്ടലില് നടന്ന ചടങ്ങിനിടെയാണ് വെടിവയ്പ്പുണ്ടായത്. ആക്രമണത്തില് ഒരു സീക്രട്ട് സര്വീസ് ഏജന്റിന് പരിക്കേറ്റു. വെടിവയ്പ്പുണ്ടായതിനെ തുടര്ന്ന് പ്രസിഡന്റും വൈസ് പ്രസിഡന്റും ഉള്പ്പടെയുള്ളവരെ ഫെഡറല് ഉദ്യോഗസ്ഥര് സുരക്ഷിത സ്ഥാനത്തേക്ക് മാറ്റി. ഹോട്ടലില് അതിക്രമിച്ചു കയറി വെടിവയ്പ്പ് നടത്തിയ തോക്കുധാരിയെ പോലീസ് അറസ്റ്റ് ചെയ്തിട്ടുണ്ട്.
