ഡാക്കര്‍, സെനഗല്‍:  ഇസ്ലാമിക ഭീകരതയും ആഭ്യന്തര സുരക്ഷാ പ്രശ്‌നങ്ങളെും വെല്ലുവിളി ഉയര്‍ത്തുന്ന നൈജീരിയക്ക് സഹായവുമായി അമേരിക്ക. ഇതിന്റെ ഭാഗമായി അത്യാധുനിക റീപ്പര്‍ ഡ്രോണുകള്‍  അമേരിക്ക നൈജീരിയയില്‍ വിന്യസിച്ചു. നൈജീരിയന്‍ സൈന്യത്തിന് പരിശീലനവും ഇന്റലിജന്‍സ് സഹായവും നല്‍കാനായി 200 യുഎസ് സൈനികരെ അയച്ചതിന് പുറമെയാണ് ഡ്രോണുകള്‍ വിന്യസിച്ചത്. നൈജീരിയന്‍ ക്രൈസ്തവരെ ലക്ഷ്യമാക്കി  ബൊക്കോ ഹറാം അടക്കമുള്ള ഭീകര സംഘടനകള്‍ നടത്തുന്ന ആക്രമണങ്ങള്‍ വര്‍ധിച്ചു വരുന്നതിനെ തുടര്‍ന്ന് യുഎസ് പ്രസിഡന്റ് ഡൊണാള്‍ഡ് ട്രംപിന്റെ നിര്‍ദേശപ്രകാരം നൈജീരിയയും യുഎസും രൂപീകരിച്ച പുതിയ സുരക്ഷാ സഖ്യത്തിന്റെ ഭാഗമായാണ് ഈ നടപടികളെന്ന് വിവിധ റിപ്പോര്‍ട്ടുകള്‍ സൂചിപ്പിക്കുന്നു.

അമേരിക്കന്‍ സൈന്യവും സിഐഎയും അഫ്ഗാനിസ്ഥാന്‍, ഇറാഖ്, യെമന്‍ തുടങ്ങിയ രാജ്യങ്ങളില്‍ വര്‍ഷങ്ങളായി ഉപയോഗിക്കുന്നവയാണ് റീപ്പര്‍ ഡ്രോണുകള്‍. കടല്‍നിരപ്പില്‍ നിന്ന് 40,000 അടി മുകളില്‍ വരെ പറക്കാന്‍ ശേഷിയുള്ള ഈ ഡ്രോണുകള്‍ക്ക് തുടര്‍ച്ചയായി 30 മണിക്കൂറിലധികം ആകാശത്ത് തുടരാന്‍ ശേഷിയുണ്ട്. രഹസ്യാന്വേഷണത്തിനും നിരീക്ഷണത്തിനുമാണ് ഇവയെ ഉപയോഗിക്കുകയെന്ന് യുഎസ് ആഫ്രിക്കന്‍ കമാന്‍ഡ് വ്യക്തമാക്കി. ഏകദേശം 30 ദശലക്ഷം ഡോളറാണ് ഒരു ഡ്രോണിന്റെ വില.