കൊച്ചി: വാക്കുകൊണ്ട് തിരുത്തുന്നതിനെക്കാള് ജീവിതംകൊണ്ടു തിരുത്തുന്നതാണ് ദൈവത്തിനു പ്രിയങ്കരമെന്ന് ആര്ച്ചുബിഷപ് മാര് റാഫേല് തട്ടില്. എറണാകുളം സെന്റ് മേരീസ് ബസിലിക്കയില് ഓശാന ഞായര് തിരുക്കര്മ്മങ്ങളില് മുഖ്യകാര്മ്മികത്വം വഹിച്ചു സന്ദേശം നല്കുകയായിരുന്നു അദ്ദേഹം.
ഗാഗുല്ത്തായിലെ വലതുവശത്തെ കള്ളന് തിരുത്താന് കാണിച്ച മാതൃക പാഠമാണ്. ഓശാനത്തിരുനാള് നമ്മെ വിളിക്കുന്നത് കല്ലും മുള്ളുമുള്ള കാല്വരിയിലേക്കാണ്. നമ്മുടെ സങ്കടങ്ങളും കണ്ണീരുമെല്ലാം ദൈവ വഴിയിലൂടെ നമ്മെ വഴി നടത്തുന്ന നക്ഷത്രങ്ങളായി കാണണമെന്ന് മാര് തട്ടില് പറഞ്ഞു.
ജീവിതത്തില് തിരുത്തലുകള് നടത്താനുള്ള അവസരമാണ് വിശുദ്ധവാരം. ലോകത്തെ തിരഞ്ഞെടുക്കണമോ ദൈവത്തെ തിരഞ്ഞെടുക്കണമോ എന്നു തീരുമാനിക്കാനുള്ള അവസരമാണ് വിശുദ്ധവാരം; മാര് തട്ടില് പറഞ്ഞു.
എറണാകുളംഅങ്കമാലി അതിരൂപത വികാരി ജനറാള്മാരായ റവ. ഡോ. ആന്റോ ചേരാംതുരുത്തി, റവ. ഡോ. ജോസ് പുതിയേടത്ത്, ബസിലിക്ക അഡ്മിനിസ്ട്രറ്റര് ഫാ. തോമസ് മങ്ങാട്ട് എന്നിവര് സഹകാര്മ്മികരായിരുന്നു.
