മാഡ്രിഡ്: സ്‌പെയിനിലെ ആഭ്യന്തരയുദ്ധകാലത്ത് ‘വിശ്വാസത്തോടുള്ള വിദ്വേഷത്താല്‍’ കൊല്ലപ്പെട്ട 50 പേരുടെ രക്തസാക്ഷിത്വം ലിയോ 14-ാമന്‍ പാപ്പ ഔദ്യോഗികമായി അംഗീകരിച്ചു. വിശുദ്ധര്‍ക്കായുള്ള തിരുസംഘത്തിന്റെ അധ്യക്ഷന്‍ കര്‍ദിനാള്‍ മാര്‍സെല്ലോ സെമെരാരോയുമായി നടത്തിയ കൂടിക്കാഴ്ചയിലാണ് പാപ്പ ഇത് സംബന്ധിച്ച ഡിക്രി പുറപ്പെടുവിക്കാന്‍ അനുമതി നല്‍കിയത്.

സ്‌പെയിനിലെ ഇടവക വൈദികനായിരുന്ന എമ്മാനുവേല ബെറംഗ്വര്‍ കൂസല്ലയുടെയും വിശുദ്ധ ഗബ്രിയേലിന്റെ നാമധേയത്തിലുള്ള സന്യാസ കൂട്ടായ്മയിലെ അംഗമായ സ്റ്റാനിസ്ലാവോ ഒര്‍ട്ടേഗ ഗാര്‍സിയയുടെയും 48 സഹപ്രവര്‍ത്തകരുടെയും രക്തസാക്ഷിത്വമാണ് പാപ്പ അംഗീകരിച്ചത്. 1936 ജൂലൈ മാസത്തിനും നവംബറിനുമിടയില്‍ സ്‌പെയിനിലെ കാറ്റലോണിയയിലെ വിവിധ ഭാഗങ്ങളില്‍ കൊല്ലപ്പെട്ടവരാണ് ഈ 50 പേരും. സ്പാനിഷ് ആഭ്യന്തരയുദ്ധകാലത്ത് നടന്ന മതപീഡനത്തിന്റെ ഭാഗമായാണ് ഇവര്‍ രക്തസാക്ഷിത്വം വരിച്ചത്.