വത്തിക്കാന് സിറ്റി: ഈസ്റ്റര് ഏറ്റവും പവിത്രമായ സമയമാണെന്നും അത് സമാധാനത്തിന്റെ സമായമായിരിക്കണെന്നും ലോകത്തെ ഓര്മിപ്പിച്ച് ലിയോ 14-ാമന് പാപ്പ. എന്നാല് ലോകത്തിന്റെ പല ഭാഗങ്ങളിലും നിരപരാധികളായ കുട്ടികള് ഉള്പ്പെടെ അനേകര് കൊല്ലപ്പെടുന്നതും ദുരിതമനുഭവിക്കുന്നതായും പാപ്പ പറഞ്ഞു.
മധ്യേഷ്യയിലെ യുദ്ധം അവസാനിപ്പിക്കാന് അമേരിക്കന് പ്രസിഡന്റ് ഡൊണാള്ഡ് ട്രംപ് ആഗ്രഹിക്കുന്നു എന്ന വാര്ത്തകളില് പാപ്പ പ്രത്യാശ പ്രകടിപ്പിച്ചു. അക്രമവും ബോംബാക്രമണവും കുറയ്ക്കുന്നതിനുള്ള ഒരു വഴി ട്രംപ് കണ്ടെത്തുമെന്ന് താന് പ്രതീക്ഷിക്കുന്നതായും അത് സാധ്യമായാല് ഇന്ന് മിഡില് ഈസ്റ്റിലും ലോകത്തിന്റെ മറ്റ് ഭാഗങ്ങളിലും പടര്ന്നുകൊണ്ടിരിക്കുന്ന വെറുപ്പ് ഇല്ലാതാക്കുന്നതിനുള്ള പ്രധാനപ്പെട്ട സംഭാവനയായി അത് മാറുമെന്നും കാസ്റ്റല് ഗാണ്ടോള്ഫോയിലെ പേപ്പല് വസതിക്ക് പുറത്ത് മാധ്യമപ്രവര്ത്തകരുമായി നടത്തിയ കൂടിക്കാഴ്ചയില് പാപ്പ പറഞ്ഞു.
അക്രമവും വെറുപ്പും യുദ്ധവും അനുഭവിക്കുന്ന നിരപരാധികളിലൂടെ ക്രിസ്തു ഇന്നും ക്രൂശിക്കപ്പെടുകയാണെന്നും, അവര്ക്കായി പ്രാര്ത്ഥിക്കണമെന്നും പാപ്പ വിശ്വാസികളോട് ആഹ്വാനം ചെയ്തു. ലോകനേതാക്കള് ചര്ച്ചയുടെ മേശയിലേക്ക് മടങ്ങിവരണമെന്നും പ്രശ്നങ്ങള്ക്ക് സമാധാനപരമായ പരിഹാരം കണ്ടെത്തണമെന്നും പാപ്പ ആവശ്യപ്പെട്ടു. ‘നമുക്ക് പ്രശ്നങ്ങള്ക്ക് പരിഹാരം തേടാം. നമ്മള് പ്രോത്സാഹിപ്പിക്കുന്ന അക്രമത്തിന്റെ അളവ് കുറയ്ക്കാനുള്ള വഴികള് കണ്ടെത്താം. ഈ ഈസ്റ്റര് കാലത്തെങ്കിലും നമ്മുടെ ഹൃദയങ്ങളില് സമാധാനം വാഴട്ടെ,’ പാപ്പ ലോകനേതാക്കളോട് ആഹ്വാനം ചെയ്തു.
