പുയിബ്ല/മെക്‌സിക്കോ: മെക്‌സിക്കോയിലെ പുയിബ്ല നഗരത്തില്‍ നടക്കുന്ന ദുഃഖവെള്ളി പ്രദക്ഷിണത്തില്‍ ഈ വര്‍ഷം രണ്ട് ലക്ഷത്തോളം വിശ്വാസികള്‍ പങ്കെടുക്കും. ലാറ്റിന്‍ അമേരിക്കയിലെ തന്നെ ഏറ്റവും വലിയ മതപരമായ ചടങ്ങുകളില്‍ ഒന്നായി കണക്കാക്കപ്പെടുന്ന ഈ പ്രദക്ഷിണം ‘മാലാഖമാരുടെ നഗരം’ എന്നറിയപ്പെടുന്ന പുയിബ്ല നഗരത്തിന്റെ ചരിത്രപ്രാധാന്യമുള്ള തെരുവുകളിലൂടെയാണ് കടന്നുപോകുന്നത്. പരമ്പരാഗതമായ കുരിശിന്റെ വഴിയില്‍ നിന്ന് വ്യത്യസ്തമായി മിശിഹായുടെ പീഡാനുഭവങ്ങളെ ധ്യാനിച്ചുകൊണ്ട് നടത്തുന്ന ഈ പ്രദക്ഷിണം ഒരു സാംസ്‌കാരിക ആഘോഷം കൂടെയാണ്.

പുയിബ്ല അതിരൂപത ആര്‍ച്ചുബിഷപ് വിക്ടര്‍ സാഞ്ചസ് എസ്പിനോസ പ്രദക്ഷിണത്തിന് നേതൃത്വം നല്‍കും. ഉച്ചയ്ക്ക് 12 മണിക്ക് പുയിബ്ല കത്തീഡ്രലില്‍ നിന്ന് ആരംഭിക്കുന്ന പ്രദക്ഷിണം ഉച്ചകഴിഞ്ഞ് 3 മണിയോടെ കത്തീഡ്രലില്‍ തന്നെ സമാപിക്കും. തുടര്‍ന്ന് ആര്‍ച്ചുബിഷപ് നല്‍കുന്ന സമാപനാശിര്‍വാദം സ്വീകരിക്കുന്നവര്‍ക്ക് മറ്റ് മാനദണ്ഡങ്ങള്‍ പൂര്‍ത്തീകരിച്ചുകൊണ്ട് പൂര്‍ണദണ്ഡവിമോചനവും പ്രാപിക്കാന്‍ അവസരം ലഭിക്കും.

1531-ല്‍ സ്ഥാപിതമായ ഈ നഗരം ‘മാലാഖമാരുടെ നഗരം’ എന്നാണ് അറിയപ്പെടുന്നത്. 16-ാം നൂറ്റാണ്ട് മുതല്‍ നിലനിന്നിരുന്ന ഈ പാരമ്പര്യം 1860-കളിലെ രാഷ്ട്രീയ മാറ്റങ്ങളെത്തുടര്‍ന്ന് നിര്‍ത്തലാക്കിയിരുന്നു. എന്നാല്‍ 1992-ല്‍ നിയമങ്ങളില്‍ മാറ്റം വന്നതോടെ പ്രദക്ഷിണം പുനരാരംഭിക്കുകയായിരുന്നു.