കൊച്ചി: മലയാളിയുടെ പ്രാര്ത്ഥനാ വേളകളെ സംഗീതസാന്ദ്രമാക്കിയ നിരവധി ഗാനങ്ങള്ക്ക് ഈണം പകര്ന്ന ഫാ. ജസ്റ്റിന് പനയ്ക്കല് ഒസിഡി നിത്യസമ്മാനത്തിനായി യാത്രായി.
പൈതലാം യേശുവേ…, ദൈവം പിറക്കുന്നു, മഞ്ഞു പൊഴിയുന്ന മാമരം കോച്ചുന്ന, ദൈവം നിരുപമ സ്നേഹം, യേശു എന്റെ പ്രാണനാഥന്, സ്നേഹ സ്വരൂപ, പുതിയൊരു പുലരി…എന്നിങ്ങനെ വിശ്വാസികളുടെ ചുണ്ടുകളില് തത്തിക്കളിക്കുന്ന നിരവധി അനശ്വര ഗാനങ്ങള്ക്ക് സംഗീത സംവിധാനം നിര്വഹിച്ചത് ഫാ. ജസ്റ്റിന് പനയ്ക്കലായിരുന്നു.
ഗാനഗന്ധര്വന് ഡോ. കെ.ജെ യേശുദാസ്, മലയാളത്തിന്റെ വാനമ്പാടി കെ.എസ് ചിത്ര എന്നിവരാണ് ഫാ. ജസ്റ്റിന്റെ പ്രധാന ഗാനങ്ങള് ആലപിച്ചത്. യേശുദാസിന്റെ ഉടമസ്ഥതയില് പ്രവര്ത്തിച്ചിരുന്ന തരംഗിണി പുറത്തിറക്കിയ തളിര്മാല്യം, സ്നേഹ പ്രവാഹം, സ്നേഹസന്ദേശം എന്നീ കാസറ്റുകള്ക്ക് സംഗീത സംവിധാനം നിര്വഹിച്ചതും ഫാ. ജസ്റ്റിന് പനക്കലായിരുന്നു.
എറണാകുളം കുമ്പളങ്ങി പനയ്ക്കല് വീട്ടില് ജോബ്-ഇസബേല് ദമ്പതികളുടെ മകനായി ജനിച്ച മകന് ജസ്റ്റിന്റെ സംഗീതഗുരു അമ്മ ഇസബേല് ആയിരുന്നു.
റോമില്നിന്നു ദൈവശാസ്ത്രത്തില് ഡോക്ടറേറ്റ് നേടിയ ശേഷം ആലുവ കാര്മ്മല്ഗിരി- മംഗലപ്പുഴ സെമിനാരികളില് പ്രഫസറായിരുന്നു. അക്കാലത്ത് ആകാശവാണിയിലെ ശാസ്ത്രീയ സംഗീതപാഠം കേട്ടും പുസ്തകങ്ങളുടെ സഹായത്തോടെയുമാണ് സംഗീതം ശാസ്ത്രീയമായി പഠിച്ചത്.
17 പുസ്തകങ്ങളുടെ രചയിതാവായ ഈ കര്മ്മലീത്താ സന്യാസി ധ്യാനപ്രസംഗകനുമായിരുന്നു. വാക്കുകള്ക്ക് അതീതമായ ഒരു ആത്മീയ അനുഭവമാണ് ഫാ. ജസ്റ്റിന് പനക്കലിന്റെ ഗാനങ്ങള് പകരുന്നത്. ആ ഈണങ്ങള് വിശ്വാസികളുടെ ഹൃദയങ്ങളില് ദൈവസാന്നിധ്യ അനുഭവമാണ് നിറയ്ക്കുന്നതും.
