ബംഗളുരു: തീര്ത്ഥാടക സഭയുടെ വിശ്വാസ സംരക്ഷണം എന്ന പേരില് നാഷണല് കാറ്റെക്കറ്റിക്കല് ഡയറക്ടറിയുടെ പുതുക്കിയ പതിപ്പ് പ്രകാശനം ചെയ്തു. ബംഗളുരു സെന്റ് ജോണ്സ് നാഷണല് അക്കാദമി ഓഫ് ഹെല്ത്ത് സയന്സസില് നടന്ന സിസിബിഐ നാഷണല് സിനഡല് അസംബ്ലിയിലായിരുന്നു പ്രകാശനം .
സിസിബിഐയുടെയും എഫ്എബിസിയുടെയും പ്രസിഡന്റ് കര്ദനാള് ഡോ . ഫിലിപ്പ് നേരി ഫെറാവോയാണ് ഡയറക്ടറി പ്രകാശനം ചെയ്തത്.
ഹൈദരാബാദ് ആര്ച്ചുബിഷപ് കര്ദിനാള് ഡോ. ആന്റണി പൂള; സിസിബിഐ വൈസ് പ്രസിഡന്റ് ആര്ച്ചുബിഷപ് ഡോ. പീറ്റര് മച്ചാഡോ, സിസിബിഐ സെക്രട്ടറി ജനറല് ആര്ച്ചുബിഷപ് ഡോ. വിന്സെന്റ് ഐന്ഡ്, കമ്മീഷന് ഫോര് ഫെയ്ത്ത് ഫോര്മേഷന് ചെയര്മാന് ബിഷപ് മാര് ജോര്ജ് പള്ളിപ്പറമ്പില് എന്നിവര് പങ്കെടുത്തു.
സിസിബിഐ ഡെപ്യൂട്ടി സെക്രട്ടറി ജനറല് റവ. ഡോ. സ്റ്റീഫന് ആലത്തറ, കമ്മീഷന് ഫോര് ഫെയ്ത്ത് ഫോര്മേഷന് എക്സിക്യൂട്ടീവ് സെക്രട്ടറി ഫാ. വിജയ് മച്ചാഡോ, റവ. ഡോ. ഗില്ബര്ട്ട് ചൂണ്ടല് എസ്ഡിബി, നിഗല് ഫെര്ണാണ്ടസ് എന്നിവരും സന്നിഹിതരായിരുന്നു.
2014 ഏപ്രിലില് നവസുവിശേഷവല്ക്കരണ പ്രോത്സാഹനത്തിനായുള്ള പൊന്തിഫിക്കല് കൗണ്സില് അംഗീകരിച്ച ഈ പരിഷ്കരിച്ച പതിപ്പ്, മതബോധന ഡയറക്ടറിയുടെ കാതലായ ഘടനയും ഉള്ളടക്കവും നിലനിര്ത്തിക്കൊണ്ട്, സമീപകാല സഭാ പഠനങ്ങളും ഉയര്ന്നുവരുന്ന സാമൂഹിക പ്രവണതകളും പ്രതിഫലിപ്പിക്കുന്നു.
റവ. ഡോ. സ്റ്റീഫന് ആലത്തറ, ഫാ. വിജയ് മച്ചാഡോ, റവ. ഡോ. ഗില്ബെര്ട്ട് ചൂണ്ടല് എസ്ഡിബി, ഫാ. ഡുമിംഗ് ഗോണ്സാല്വസ്, ഫാ. രോഹിത് ഡി’കോസ്റ്റ, ഫാ. ദിനേശ് വാസവ എസ്ഡിബി, ഫാ. കുമുഡോ ഡിഗല് എസ്ഡിബി, സിസ്റ്റര് സിജി ലോനന് എന്നിവരടങ്ങുന്ന സംഘത്തിന്റെ നിര്ദേശപ്രകാരം, സിസിബിഐ കമ്മീഷന് ഫോര് ഫെയ്ത്ത് ഫോര്മേഷനാണ് ഇത് തയാറാക്കാന് നേതൃത്വം നല്കിയത്.
തീര്ത്ഥാടകരുടെ വിശ്വാസ സംരക്ഷണം, വിശ്വാസ രൂപീകരണം എന്നിവയ്ക്ക് വ്യക്തമായ മാനദണ്ഡങ്ങളും തത്വങ്ങളും മാര്ഗ്ഗനിര്ദ്ദേശങ്ങളും ഡയറക്ടറി നല്കുന്നു. മതബോധനം, സുവിശേഷവല്ക്കരണം, ആരാധന, കൂട്ടായ്മ, സേവനം എന്നിവ തമ്മിലുള്ള അടുത്ത ബന്ധം ഇത് എടുത്തുകാണിക്കുന്നു. പുതിയ പതിപ്പ് ആകര്ഷകമായ ചിത്രീകരണങ്ങളും സഭാ സ്രോതസ്സുകളില് നിന്നുള്ള അര്ത്ഥവത്തായ ഉദ്ധരണികളും കൊണ്ട് സമ്പന്നമാണ്.
സാംസ്കാരിക വൈവിധ്യത്തെ മാനിക്കുമ്പോള് തന്നെ ക്രിസ്തീയ സന്ദേശം പ്രഖ്യാപിക്കുന്നതില് ഐക്യം പ്രോത്സാഹിപ്പിക്കുക എന്നതാണ് ഡയറക്ടറി ലക്ഷ്യമിടുന്നത്.ബിഷപ്പുമാര്, പുരോഹിതന്മാര്, മതവിശ്വാസികള്, മതബോധന വിദഗ്ധര്, പ്രിന്സിപ്പല്മാര്, മതബോധന കേന്ദ്രങ്ങളുടെ ഡയറക്ടര്മാര്, യൂത്ത് ആനിമേറ്റര്മാര്, ബിഇസി അംഗങ്ങള്, സെമിനാരികള് എന്നിവര്ക്കുള്ള സമഗ്രമായ വഴികാട്ടിയാണിത്.
