വത്തിക്കാന്‍ സിറ്റി: കാനന്‍ നിയമങ്ങളുമായി ബന്ധപ്പെട്ട രേഖകള്‍ പ്രസിദ്ധീകരിക്കുകയും വ്യാഖ്യാനിക്കുകയും വത്തിക്കാന് നിയമോപദേശം നല്‍കുകയും ചെയ്യുന്ന ഡിക്കാസ്ട്രി ഫോര്‍ ലെജിസ്ലേറ്റീവ് ടെക്സ്റ്റ്‌സിന്റെ തലവനായി ഓസ്ട്രലിയന്‍ ബിഷപ്പും നിയമവിദഗ്ധനുമായ  ആന്‍റണി  റാന്‍ഡോസയെ (Bishop Anthony Randazzo) ലിയോ 14- ാമന്‍ പാപ്പ നിയമിച്ചു. നിയമനത്തോടനുബന്ധിച്ച്  ആന്‍റണി   റാന്‍ഡോസയെ ആര്‍ച്ചുബിഷപ് സ്ഥാനത്തേക്ക് പാപ്പ ഉയിര്‍ത്തിയിട്ടുണ്ട്.

ഓസ്ട്രേലിയയിലെ ‘ബ്രോക്കണ്‍ ബേ ‘   രൂപതാധ്യക്ഷനും 59-കാരനുമായ റാന്‍ഡാസോ, ആര്‍ച്ചുബിഷപ് ഫിലിപ്പോ യാനോനെയുടെ പിന്‍ഗാമിയായാണ് ചുമതലയേല്‍ക്കുന്നത്. കത്തോലിക്കാ സഭയുടെ ആഭ്യന്തര നിയമമായ കാനോന്‍ നിയമങ്ങള്‍ എഴുതുന്നതിനും വ്യാഖ്യാനിക്കുന്നതിനും പുറമെ, വത്തിക്കാന്‍ സിറ്റി സ്റ്റേറ്റിന് ആവശ്യമായ നിയമോപദേശങ്ങള്‍ നല്‍കുന്നതും ഈ ഓഫീസാണ്.

പ്രശസ്തമായ പൊന്തിഫിക്കല്‍ ഗ്രിഗോറിയന്‍ യൂണിവേഴ്സിറ്റിയില്‍ നിന്ന് സഭാനിയമത്തില്‍ ഉന്നത പഠനം പൂര്‍ത്തിയാക്കിയ ആര്‍ച്ചുബിഷപ് റാന്‍ഡോസെ വത്തിക്കാന്‍ വിശ്വാസ തിരുസംഘത്തില്‍ അഞ്ച് വര്‍ഷം ജോലി ചെയ്തിട്ടുണ്ട്.