കൊച്ചി: മുനമ്പം പ്രശ്നം ശാശ്വതമായി പരിഹരിക്കു ന്നതിനുള്ള നടപടികള് സര്ക്കാര് സ്വീകരിക്കണമെന്ന് കേരള റീജിയന് ലാറ്റിന് കാത്തലിക് കൗണ്സിലിന്റെ (കെആര്എല്സിസി) 47-ാം ജനറല് അസംബ്ലി.
ജെ.ബി കോശി കമ്മീഷന് റിപ്പോര്ട്ട് അടിയന്തരമായി നടപ്പിലാക്കണമെന്ന് ഇടക്കൊച്ചി ആല്ഫ പാസ്റ്ററല് സെന്ററില് നടന്ന സമ്മേളനം സര്ക്കാരിനോട് ആവശ്യപ്പെട്ടു. റിപ്പോര്ട്ട് നടപ്പാക്കുന്നതു സംബന്ധിച്ച് ബന്ധപ്പെട്ട വിഭാഗങ്ങളുടെ യോഗം വിളിക്കുകയും മുന്ഗണന നിശ്ചയിച്ച് ശിപാര്ശകള് നടപ്പിലാക്കുകയും ചെയ്യണം.
മുതലപ്പൊഴിയിലെ പ്രശ്നങ്ങള് ശാശ്വതമായി പരിഹരിക്കണം. മിഷന് സമുദ്ര പ്രതീക്ഷകള് നല്കുന്നുണ്ടെങ്കിലും പദ്ധതി സൃഷ്ടിക്കാവുന്ന സാമൂഹിക -പാരിസ്ഥിതിക ആഘാതം സംബന്ധിച്ച് പഠനം നടത്തുകയും നിലനില്ക്കുന്ന സംശയങ്ങളും ആശങ്കകളും മത്സ്യത്തൊഴിലാളി സമൂഹങ്ങളുമായി നേരിട്ടു സംവദിച്ച് സുതാര്യമാക്കണമെന്നും സമ്മേളനം ആവശ്യപ്പെട്ടു.
ചെല്ലാനത്ത് കടല്ഭിത്തിയുടെ ശേഷിക്കുന്ന ഭാഗം പൂര്ത്തിയാക്കുന്നതിനും നിലവിലുള്ള ടെട്രാപോഡ് കടല്ഭിത്തി താഴുന്നുവെന്ന പരാതി പരിഹരി ക്കുന്നതിനും നടപടി സ്വീകരിക്കണമെന്നും സമ്മേളനം ആവശ്യപ്പെട്ടു.
കെആര്എല്സിസി പ്രസിഡന്റ് ആര്ച്ചുബിഷപ് ഡോ. വര്ഗീസ് ചക്കാലയ്ക്കല് സമാപനസന്ദേശം നല്കി. വൈസ് പ്രസിഡന്റ് ജോസഫ് ജൂഡ്, ജനറല് സെക്രട്ടറി ഫാ. ജിജു ജോര്ജ് അറക്കത്തറ എന്നിവര് പ്രസംഗിച്ചു. അഡ്വ. ഷെറി ജെ. തോമസ് രാഷ്ട്രീയകാര്യസമിതി റിപ്പോര്ട്ടും ബിജു ജോസി സാമ്പത്തിക റിപ്പോര്ട്ടും അവതരിപ്പിച്ചു. സെക്രട്ടറിമാരായ മെറ്റില്ഡ മൈക്കിള്, പാട്രിക് മൈക്കിള് എന്നിവര് പ്രസംഗിച്ചു.
അസംബ്ലിയില് കേരളത്തിലെ 12 ലത്തീന് കത്തോലിക്കാ രൂപതകളില്നിന്നുള്ള ബിഷപ്പുമാരും വൈദികരും സന്യസ്തരും അല്മായരുമടങ്ങുന്ന പ്രതിനിധികള് പങ്കെടുത്തു.
