പാരീസ്/ഫ്രാന്‍സ്: ലിയോ 14-ാമന്‍ മാര്‍പാപ്പ ഈ വര്‍ഷം സെപ്റ്റംബറില്‍ ഫ്രാന്‍സിലേക്ക് അപ്പസ്‌തോലിക സന്ദര്‍ശനം നടത്തും. സെപ്റ്റംബര്‍ 25 മുതല്‍ 28 വരെയാണ് സന്ദര്‍ശനം. 18 വര്‍ഷത്തെ ഇടവേളക്ക് ശേഷമാണ് മാര്‍പാപ്പ ഫ്രാന്‍സിലേക്ക് ഔദ്യോഗിക സന്ദര്‍ശനം നടത്തുന്നത്. ഇതിനുമുമ്പ് 2008-ല്‍ ബനഡിക്ട് 16 -ാമന്‍ മാര്‍പാപ്പയാണ് ഔദ്യോഗികമായി ഫ്രാന്‍സ് സന്ദര്‍ശിച്ചത്. ഫ്രഞ്ച് സഭയുടെയും രാഷ്ട്രത്തിന്റെയും ക്ഷണത്തിന് പുറമെ യുനെസ്‌കോയുടെയും ക്ഷണം സ്വീകരിച്ചാണ് പാപ്പയുടെ സന്ദര്‍ശനം. യാത്രയുടെ ഭാഗമായി പാപ്പ യുനെസ്‌കോയുടെ ആസ്ഥാനവും സന്ദര്‍ശിക്കും.

മാര്‍പാപ്പയുടെ ഫ്രാന്‍സ് സന്ദര്‍ശനത്തിന്റെ മുന്നോടിയായി ഫ്രഞ്ച് ബിഷപ്‌സ് കോണ്‍ഫ്രന്‍സ് യാത്രയുടെ ഔദ്യോഗിക ലോഗോ പുറത്തിറക്കി. കത്തോലിക്കാ ആത്മീയതയും ഫ്രഞ്ച് സംസ്‌കാരവും ഒത്തുചേരുന്ന ആധുനികവും പ്രതീകാത്മകവുമായ രൂപകല്‍പ്പനയാണ് ലോഗോയുടേത്. ‘ലോകത്തിന് ജീവനുണ്ടാകേണ്ടതിന്’ എന്ന ബൈബിള്‍ വചനമാണ് ഈ സന്ദര്‍ശനത്തിന്റെ ആപ്തവാക്യമായി തിരഞ്ഞെടുത്തിരിക്കുന്നത്. ഇതിനെ ആസ്പദമാക്കി ഫ്രഞ്ച് ഡിസൈന്‍ സ്റ്റുഡിയോ ‘അറ്റ്‌ലിയര്‍ അര്‍ഗോ’ ആണ് ലോഗോ തയാറാക്കിയത്.

ലോഗോയുടെ മധ്യത്തിലായി നീല നിറത്തിലുള്ള ഒരു പ്രാവും അതിന്റെ ചുണ്ടില്‍ ഒലിവ് ഇലയുമുണ്ട്. ഇത് സമാധാനത്തെയും ജീവന്റെ പുനര്‍ജനനത്തെയും പ്രതിനിധീകരിക്കുന്നു. ഫ്രാന്‍സിന്റെ ദേശീയ പതാകയിലെ ത്രിവര്‍ണ്ണങ്ങളും ജീവന്റെ പ്രസരിപ്പിനെ സൂചിപ്പിക്കുന്ന ഓറഞ്ച് നിറവും, പ്രത്യാശയുടെ പച്ച നിറവും ലോഗോയില്‍ മനോഹരമായി ചേര്‍ത്തുവെച്ചിരിക്കുന്നു. ലോഗോയില്‍ പാപ്പയുടെ പേര് രേഖപ്പെടുത്തുന്നതിനായി പുതിയ ഒരു ലിപി തന്നെ രൂപകല്‍പ്പന ചെയ്തു. കൂടാതെ, മാര്‍പാപ്പ സന്ദര്‍ശിക്കുന്ന ഫ്രാന്‍സിലെ പ്രധാന സ്ഥലങ്ങളായ പാരീസ്, ലൂര്‍ദ്, മെറ്റ്‌സ് എന്നീ നഗരങ്ങളെ സൂചിപ്പിക്കുന്ന ലളിതമായ ചിത്രീകരണങ്ങളും ഇതിനൊപ്പം ഉള്‍പ്പെടുത്തിയിട്ടുണ്ട്.