കാക്കനാട്: സീറോമലബാര് സഭയുടെ ഇന്റര്നെറ്റ് മിഷന്റെ എക്സിക്യൂട്ടീവ് ഡയറക്ടറായി കാഞ്ഞി രപ്പള്ളി രൂപതാംഗമായ ഫാ. ജോമി കുമ്പുകാട്ട് നിയമിതനായി. നിലവില് കാഞ്ഞിരപ്പള്ളി രൂപതയുടെ കീഴിലുള്ള കുട്ടിക്കാനം മരിയന് കോളേജില് സേവനം ചെയ്തുവരികയാണ് അദ്ദേഹം. മഹാത്മാ ഗാന്ധി സര്വ്വകലാശാലയില് നിന്നു കമ്മ്യൂണിക്കേഷന് ആന്ഡ് മീഡിയ സയന്സില് ബിരുദാനന്തര ബിരുദം നേടിയിട്ടുണ്ട്.
കഴിഞ്ഞ ആറു വര്ഷമായി സഭയുടെ ഇന്റര്നെറ്റ് മിഷന് എക്സിക്യൂട്ടീവ് ഡയറക്ടറുടെ ചുമതല വഹിച്ചിരുന്ന ഇരിങ്ങാലക്കുട രൂപതാംഗമായ ഫാ. സെബി കുളങ്ങര, സേവനകാലാവധി പൂര്ത്തിയാക്കിയതിനെത്തുടര്ന്നാണ് പുതിയ നിയമനം.
ഇന്റര്നെറ്റ് മിഷന്റെ ചെയര്മാന് ബിഷപ് മാര് ജോസഫ് പണ്ടാരശേരി സഭയുടെ പെര്മനന്റ് സിനഡിന്റെ അംഗീകാരത്തോടെയാണ് പുതിയ നിയമനം നടത്തിയത്. ജൂലൈ ഒന്നാം തീയതി നിയമനം പ്രാബല്യത്തില് വരും.
