മാപുട്ടോ/മൊസാംബിക്ക്: മൊസാംബിക്കിലെ കാബോ ഡെല്ഗാഡോ പ്രവിശ്യയില് ഭീകരര് നടത്തിയ ആക്രമണത്തില് ചരിത്രപ്രസിദ്ധമായ സെന്റ് ലൂയിസ് ഡി മോണ്ട്ഫോര്ട്ട് ഇടവക ദേവാലയം പൂര്ണമായും നശിച്ചു. ഏപ്രില് 30 വ്യാഴാഴ്ച വൈകുന്നേരം നടന്ന ആക്രമണത്തില് ഭീകരര് ദൈവാലയം തീയിട്ട് നശിപ്പിക്കുകയായിരുന്നു. ഭീകരാക്രമണത്തിന്റെ ഞെട്ടലില് നിന്ന് പ്രാദേശിക സമൂഹം മോചിതരായിട്ടില്ലെന്ന് പെംബ രൂപതാ ബിഷപ് അന്റോണിയോ ജൂലിയസ് ഫെരേര സാന്ഡ്രാമോ പറഞ്ഞു.
വടക്കന് മൊസാംബിക്കിലെ മെസയിലുള്ള പള്ളിയിലേക്ക് വൈകുന്നേരം 4 മണിയോടെയാണ് ഭീകരര് ഇരച്ചുകയറിയത്. ഈ പ്രദേശത്തെ കത്തോലിക്കാ സാന്നിധ്യത്തിന്റെ പ്രതീകമായി നിലകൊള്ളുന്ന ദേവാലയം അഗ്നിക്കിരയായിക്കിയ ഭീകരര് സമീപത്തെ വീടുകളും തകര്ത്തു. ദൈവാലയ പരിസരത്ത് വിദ്വേഷ പ്രസംഗങ്ങള് നടത്തിയാണ് ഭീകരര് മടങ്ങിയത്. ഇടവകയില് സേവനമനുഷ്ഠിക്കുന്ന കാമറൂണിയന് മിഷനറിമാര് ആക്രമണ സമയത്ത് അവിടെ ഇല്ലാതിരുന്നതിനാല് സുരക്ഷിതരാണ്. എങ്കിലും വിശ്വാസി സമൂഹം വലിയ ഭീതിയിലാണെന്ന് ബിഷപ് പറഞ്ഞു.
കാബോ ഡെല്ഗാഡോ പ്രവിശ്യയില് കഴിഞ്ഞ ഒമ്പത് വര്ഷമായി ഇസ്ലാമിസ്റ്റ് തീവ്രവാദികളുടെ ആക്രമണങ്ങള് അരങ്ങേറുന്നുണ്ട്. പെംബ രൂപതയില് മാത്രം 117 പള്ളികളും ചാപ്പലുകളും തകര്ക്കപ്പെട്ടു. 2025-ല് മാത്രം 23 ആരാധനാലയങ്ങള് നശിപ്പിക്കപ്പെട്ടു. കാബോ ഡെല്ഗാഡോ പ്രദേശത്തുണ്ടായ ആക്രമണങ്ങളില് ഇതുവരെ 300-ലധികം കത്തോലിക്കര് കൊല്ലപ്പെട്ടിട്ടുണ്ട്.
പ്രദേശത്തെ ദുരിതബാധിതകര്ക്ക് അന്താരാഷ്ട്ര സമൂഹത്തിന്റെ പിന്തുണയും ഐക്യദാര്ഢ്യവും ബിഷപ് അഭ്യര്ത്ഥിച്ചു. കെട്ടിടങ്ങള് തകര്ക്കാന് സാധിക്കുമെങ്കിലും ദൈവജനത്തിന്റെ വിശ്വാസത്തെ തകര്ക്കാന് ഭീകരര്ക്ക് കഴിയില്ലെന്ന് ബിഷപ് അന്റോണിയോ ജൂലിയസ് കൂട്ടിച്ചേര്ത്തു.
