തിരുവനന്തപുരം: മലങ്കര സുറിയാനി കത്തോലിക്കാ സഭയുടെ യൂറോപ്പ് – യുകെ കണ്‍വന്‍ഷന്‍ ജൂണ്‍ 13 മുതല്‍ 15 വരെ റോമില്‍ നടക്കും. ‘വിശ്വാസത്തിലും സ്‌നേഹത്തിലും ഒന്നായി’ (United in Faith and Love) എന്നതാണ് സമ്മേളനത്തിന്റെ പ്രമേയം. സമ്മേള നത്തിന്റെ ലോഗോയും പോസ്റ്ററും സഭയുടെ തലവനും പിതാവുമായ കര്‍ദിനാള്‍ ബസേലിയോസ് മാര്‍ ക്ലീമിസ് കാതോലിക്കാ ബാവ തിരുവനന്തപുരത്ത് പ്രകാശനം ചെയ്തു. 

കണ്‍വന്‍ഷനില്‍ പങ്കുചേരുന്ന യുകെ, ഇറ്റലി, ജര്‍മ്മനി, സ്വിറ്റ്സര്‍ലാന്റ്, അയര്‍ലന്‍ഡ്, മാള്‍ട്ട, ഓസ്ട്രിയ തുടങ്ങിയ രാജ്യങ്ങളിലെ ഇടവകകളിലും പ്രകാശന ചടങ്ങുകള്‍ നടന്നു.

യൂറോപ്പ്-യു.കെയുടെ അപ്പസ്‌തോലിക് വിസിറ്റര്‍ ബിഷപ് ഡോ. കുര്യാക്കോസ് മാര്‍ ഒസ്താത്തിയോസ് യു.കെയിലും, കണ്‍വന്‍ഷന്‍ കോ-ഓര്‍ഡിനേറ്റര്‍ മോണ്‍. കുര്യാക്കോസ് ചെറുപുഴത്തോട്ടത്തില്‍ റോമിലും പ്രകാശനത്തിന് നേതൃത്വം നല്‍കി. 

കര്‍ദിനാള്‍ ബസേലിയോസ് മാര്‍ ക്ലീമിസ് കാതോലിക്കാ ബാവ, സഭയിലെ മെത്രാന്മാര്‍, വൈദികര്‍, സന്യസ്തര്‍, ആത്മീയ പ്രതിനിധികള്‍ തുടങ്ങിയവരാണ് കണ്‍വന്‍ഷനില്‍ പങ്കെടുക്കുന്നത്. കണ്‍വന്‍ഷന്‍ നടത്തിപ്പിനായി ബിഷപ് ഡോ. കുര്യാക്കോസ് മാര്‍ ഒസ്താത്തിയോസ് എപ്പിസ്‌കോപ്പ ചെയര്‍മാനും, മോണ്‍. കുര്യാക്കോസ് ചെറുപുഴത്തോട്ടത്തില്‍ ജനറല്‍ കോ-ഓര്‍ഡിനേറ്ററുമായുള്ള വിവിധ കമ്മിറ്റികള്‍ പ്രവര്‍ത്തിച്ചുവരുന്നു.