വത്തിക്കാൻ സിറ്റി: ക്രൈസ്തവ സഭകൾ തമ്മിലുള്ള ഐക്യം കൂടുതൽ ശക്തമാക്കണമെന്നും ഹൃദയങ്ങളിൽ നിന്ന് മുൻവിധികളെ ദൂരെയെറിയണമെന്നും ആഹ്വാനം ചെയ്ത് ലിയോ പതിനാലാമൻ പാപ്പ. വത്തിക്കാനിലെ അപ്പസ്തോലിക് കൊട്ടാരത്തിൽ വിവിധ പൗരസ്ത്യ ഓർത്തഡോക്സ് സഭകളിൽ നിന്നുള്ള വൈദികരുടെയും സന്യാസിമാരുടെയും പ്രതിനിധി സംഘത്തെ സ്വീകരിച്ചു സംസാരിക്കുകയായിരുന്നു അദ്ദേഹം. ക്രിസ്തുവിലുള്ള വിശ്വാസത്തിൽ ആഴപ്പെടുമ്പോൾ മാത്രമേ ക്രൈസ്തവർക്ക് കൂടുതൽ അടുത്തുവരാൻ സാധിക്കൂ എന്ന് പാപ്പ ഓർമ്മിപ്പിച്ചു. ക്രിസ്തുവാണ് നമ്മുടെ സമാധാനത്തിന്റെ ആത്യന്തിക സ്രോതസ്സെന്നും അദ്ദേഹം കൂട്ടിച്ചേർത്തു.
ക്രിസ്തീയ ഐക്യത്തിനായുള്ള ഡിക്കാസ്റ്ററി സംഘടിപ്പിച്ച പഠന സന്ദർശനത്തിന്റെ ഭാഗമായാണ് മലങ്കര ഓർത്തഡോക്സ് സഭ ഉൾപ്പെടെയുള്ള വിവിധ പൗരസ്ത്യ ഓർത്തഡോക്സ് സഭകളുടെ (Armenian, Coptic, Ethiopian, Eritrean, Syriac) പ്രതിനിധികൾ വത്തിക്കാനിലെത്തിയത്. സഭകൾക്കിടയിലുള്ള ചരിത്രപരവും സാംസ്കാരികവുമായ വ്യത്യാസങ്ങൾ നമ്മുടെ പൊതുവായ ക്രിസ്തീയ പൈതൃകത്തിന്റെ മനോഹരമായ ഒരു ‘മൊസൈക്’ ചിത്രമാണെന്ന് പാപ്പ വിശേഷിപ്പിച്ചു. ഈ വൈവിധ്യങ്ങളെ ഉൾക്കൊള്ളുന്നതോടൊപ്പം തന്നെ പൂർണ്ണമായ കൂട്ടായ്മയിലേക്കുള്ള (Communion) ചുവടുവെപ്പുകൾക്കായി നാം ഓരോരുത്തരും പ്രതിജ്ഞാബദ്ധരാകണമെന്നും അദ്ദേഹം നിർദ്ദേശിച്ചു.
നമ്മുടെ ഉള്ളിലെ മുൻവിധികളെ നീക്കം ചെയ്യുകയും ഹൃദയങ്ങളെ ‘നിരായുധമാക്കുകയും’ ചെയ്യുമ്പോൾ മാത്രമേ പരസ്നേഹത്തിൽ വളരാനും ഐക്യത്തിൽ പ്രവർത്തിക്കാനും സാധിക്കൂ എന്ന് ലിയോ പതിനാലാമൻ പാപ്പ ഓർമ്മിപ്പിച്ചു. വിശുദ്ധ പൗലോസ് അപ്പസ്തോലൻ തന്റെ ലേഖനങ്ങളിൽ വിശ്വാസികളെ ക്രിസ്തുവിന്റെ ശരീരത്തിന്റെ ഭാഗമായിട്ടാണ് ചിത്രീകരിച്ചിരിക്കുന്നത്. ഭിന്നതകൾ വെടിഞ്ഞ് പരസ്പരം പിന്തുണയ്ക്കാനും വിശ്വാസത്തിലും പ്രബോധനങ്ങളിലും ഏകത നിലനിർത്താനും അപ്പസ്തോലൻ നൽകിയ നിർദ്ദേശങ്ങൾ ഇന്നത്തെ കാലഘട്ടത്തിൽ ഏറെ പ്രസക്തമാണെന്ന് പാപ്പ ചൂണ്ടിക്കാട്ടി. ക്രൈസ്തവ ഐക്യം എന്നത് കേവലം മനുഷ്യസാധ്യമായ ഒന്നല്ല, മറിച്ച് അത് ദൈവത്തിൽ നിന്നുള്ള ദാനമാണെന്നും അദ്ദേഹം കൂട്ടിച്ചേർത്തു.
ലോകമെമ്പാടും സംഘർഷങ്ങളും വിദ്വേഷവും വർധിച്ചുവരുന്ന ഈ സാഹചര്യത്തിൽ, ക്രൈസ്തവ ഐക്യം സമാധാനത്തിനും അനുരഞ്ജനത്തിനുമുള്ള ഒരു ഉപാധിയായി മാറണമെന്ന പ്രത്യാശ പാപ്പ പങ്കുവെച്ചു. “എല്ലാവരും ഒന്നായിരിക്കണം” എന്ന യേശുവിന്റെ പ്രാർത്ഥന സാക്ഷാത്കരിക്കാനുള്ള പരിശ്രമങ്ങൾ തുടരണമെന്ന് വത്തിക്കാൻ വക്താവ് ഔദ്യോഗിക പ്രസ്താവനയിലൂടെ അറിയിച്ചു. സന്ദർശനത്തിനെത്തിയ പ്രതിനിധികളോടുള്ള നന്ദി അറിയിച്ച പാപ്പ, അവരുടെ സഭകൾക്കും വിശ്വാസികൾക്കും വേണ്ടി പ്രാർത്ഥിക്കുമെന്ന് ഉറപ്പുനൽകുകയും പരിശുദ്ധ കന്യകാമറിയത്തിന്റെ മാധ്യസ്ഥം അപേക്ഷിച്ചുകൊണ്ട് ‘സ്വർഗ്ഗസ്ഥനായ പിതാവേ’ എന്ന പ്രാർത്ഥനയോടെ കൂടിക്കാഴ്ച അവസാനിപ്പിക്കുകയും ചെയ്തു.
