മ്യൂണിക്ക്: ജർമ്മനിയിലെ മ്യൂണിക്ക് ആസ്ഥാനമായി പ്രവർത്തിക്കുന്ന ഒബ്സർവേറ്ററി ഓൺ ഇൻടോളറൻസ് ആൻഡ് ഡിസ്ക്രിമിനേഷൻ എഗെയ്ൻസ്റ്റ് ക്രിസ്ത്യൻസ് (OIDAC) പുറത്തുവിട്ട ഏറ്റവും പുതിയ കണക്കുകൾ പ്രകാരം യൂറോപ്പിൽ ക്രൈസ്തവർക്കെതിരെയുള്ള അതിക്രമങ്ങൾ ആശങ്കാജനകമാംവിധം വർധിക്കുകയാണ്. ഫെബ്രുവരി മാസത്തിൽ മാത്രം 34 ഓളം ക്രൈസ്തവ വിരുദ്ധ കുറ്റകൃത്യങ്ങളാണ് വിവിധ യൂറോപ്യൻ രാജ്യങ്ങളിലായി റിപ്പോർട്ട് ചെയ്യപ്പെട്ടിരിക്കുന്നത്. ദേവാലയങ്ങൾ, ക്രൈസ്തവ വിശ്വാസ ചിഹ്നങ്ങൾ എന്നിവയെയും വിശ്വാസികളെയും ലക്ഷ്യം വെച്ചാണ് ഇത്തരം അക്രമങ്ങൾ അരങ്ങേറുന്നതെന്ന് റിപ്പോർട്ട് വ്യക്തമാക്കുന്നു. ക്രൈസ്തവർക്കെതിരെയുള്ള അസഹിഷ്ണുതയും ആക്രമണങ്ങളും യൂറോപ്പിൽ പുതിയ വെല്ലുവിളിയായി മാറിക്കൊണ്ടിരിക്കുകയാണ്.
കഴിഞ്ഞ മാസമുണ്ടായ അക്രമ സംഭവങ്ങളിൽ പകുതിയും (17 എണ്ണം) പള്ളികളും വിശ്വാസ ചിഹ്നങ്ങളും നശിപ്പിക്കുന്ന രീതിയിലുള്ളവയായിരുന്നു. ഇതിനു പുറമെ 11 ഓളം തീവെപ്പ് കേസുകളും റിപ്പോർട്ട് ചെയ്യപ്പെട്ടിട്ടുണ്ട്. ദേവാലയങ്ങൾ അശുദ്ധമാക്കുക, വിശുദ്ധ വസ്തുക്കൾ ലക്ഷ്യം വെച്ചുള്ള മോഷണങ്ങൾ, ശാരീരികമായ അക്രമങ്ങൾ, ശ്മശാനങ്ങൾ നശിപ്പിക്കൽ എന്നിവയും ഈ വിദ്വേഷ കുറ്റകൃത്യങ്ങളുടെ പട്ടികയിൽ ഉൾപ്പെടുന്നു. ക്രൈസ്തവ വിശ്വാസത്തോടുള്ള വിരോധം പ്രകടമാക്കുന്ന രീതിയിലുള്ള ഇത്തരം അക്രമങ്ങൾ സമാധാനപരമായ സഹവർത്തിത്വത്തിന് വലിയ ഭീഷണിയാണ് ഉയർത്തുന്നത്.
വിവിധ രാജ്യങ്ങളിലെ കണക്കുകൾ പരിശോധിക്കുമ്പോൾ നിലവിൽ ഫ്രാൻസും ഇറ്റലിയുമാണ് ഈ പട്ടികയിൽ മുന്നിട്ടുനിൽക്കുന്നത്. ഇരു രാജ്യങ്ങളിലുമായി ഏഴ് അക്രമ സംഭവങ്ങൾ വീതം ഫെബ്രുവരിയിൽ റിപ്പോർട്ട് ചെയ്തു. ജർമ്മനിയിൽ ആറും നെതർലൻഡ്സിൽ മൂന്നും അക്രമങ്ങൾ നടന്നപ്പോൾ സ്പെയിൻ, സ്വീഡൻ എന്നിവിടങ്ങളിൽ രണ്ട് വീതം കേസുകൾ രേഖപ്പെടുത്തിയിട്ടുണ്ട്. കൂടാതെ പോളണ്ട്, ഗ്രീസ് തുടങ്ങിയ രാജ്യങ്ങളിലും ഓരോ സംഭവങ്ങൾ റിപ്പോർട്ട് ചെയ്തു. ബ്രിട്ടനിൽ നാലും ബോസ്നിയ ആൻഡ് ഹെർസഗോവിനയിൽ ഒന്നും അക്രമസംഭവങ്ങൾ കഴിഞ്ഞ മാസമുണ്ടായതായി റിപ്പോർട്ട് വ്യക്തമാക്കുന്നു.
കൃത്യമായ ആസൂത്രണത്തോടെയുള്ള അക്രമങ്ങളാണ് പലയിടത്തും നടന്നതെന്നത് ആശങ്ക വർധിപ്പിക്കുന്നു. ഫ്രാൻസിലെ ലോയ്റെറ്റിൽ ഒരു പള്ളിയുടെ അൾത്താരയ്ക്ക് തീയിടാനുള്ള ശ്രമം ഇതിന് ഉദാഹരണമാണ്. നെതർലൻഡ്സിലെ എയ്ഡെയിൽ വെറും അഞ്ച് ദിവസത്തിനുള്ളിൽ മൂന്ന് പള്ളികളിലാണ് തീപിടുത്തമുണ്ടായത്. ഇവ യാദൃശ്ചികമല്ലെന്നും കരുതിക്കൂട്ടിയുള്ള അക്രമങ്ങളാണെന്നും അധികൃതർ പിന്നീട് സ്ഥിരീകരിക്കുകയുണ്ടായി. പള്ളികൾക്കുള്ളിലെ വിശുദ്ധ വസ്തുക്കളെ അവഹേളിക്കുന്ന നടപടികൾ വിശ്വാസികളുടെ വികാരങ്ങളെ ആഴത്തിൽ മുറിപ്പെടുത്തുന്ന രീതിയിലായിരുന്നു.
ഇത്തരം വിദ്വേഷ കുറ്റകൃത്യങ്ങളുടെ എണ്ണവും തീവ്രതയും വർധിക്കുന്നത് യൂറോപ്പിലെ വിശ്വാസാചരണങ്ങൾക്ക് നേരിട്ടുള്ള വെല്ലുവിളിയാണ്. മതസ്വാതന്ത്ര്യം എന്നത് ലോകത്തിന് മാതൃകയായിരുന്ന യൂറോപ്പിൽ ക്രൈസ്തവ വിശ്വാസം ഇത്തരം ഭീഷണികൾ നേരിടുന്നത് വൈരുദ്ധ്യമാണ്. ക്രൈസ്തവ സമൂഹത്തെ ഭയപ്പെടുത്തുകയും അവരുടെ വിശ്വാസപരമായ സ്വത്വം ഇല്ലാതാക്കുകയും ചെയ്യുക എന്ന ലക്ഷ്യത്തോടെ പ്രവർത്തിക്കുന്ന വിദ്വേഷ ഗ്രൂപ്പുകൾ പലതുണ്ടെന്ന സൂചനകളുണ്ട്. ആരാധനാലയങ്ങൾ ആക്രമിക്കപ്പെടുന്നത് കേവലം ക്രമസമാധാന പ്രശ്നം മാത്രമല്ല, മറിച്ച് ഒരു സമൂഹത്തിന്റെ അടിസ്ഥാന അവകാശങ്ങൾക്കു മേലുള്ള കടന്നുകയറ്റം കൂടിയാണെന്ന് സാമൂഹിക നിരീക്ഷകർ ചൂണ്ടിക്കാട്ടുന്നു.
യൂറോപ്പിലെ ചില മേഖലകളിലെ ക്രൈസ്തവർക്കിടയിൽ ഈ സാഹചര്യം അരക്ഷിതാവസ്ഥ സൃഷ്ടിച്ചിട്ടുണ്ട്. വർധിച്ചുവരുന്ന ഈ മതപരമായ അസഹിഷ്ണുതയ്ക്കെതിരെ അതത് രാജ്യങ്ങളിലെ ഭരണകൂടങ്ങൾ അടിയന്തരമായും ശക്തമായും ഇടപെടേണ്ടത് അനിവാര്യമാണ്. ക്രൈസ്തവ വിരുദ്ധ നീക്കങ്ങളെ പ്രതിരോധിക്കാനും വിശ്വാസികൾക്കും ആരാധനാലയങ്ങൾക്കും ആവശ്യമായ സുരക്ഷ ഉറപ്പാക്കാനും അന്താരാഷ്ട്ര തലത്തിൽ ഗൗരവകരമായ ചർച്ചകളും നടപടികളും ഉണ്ടാകേണ്ട സമയം അതിക്രമിച്ചിരിക്കുന്നു.
