ഗുജ്രന്വാല (പാക്കിസ്ഥാന്): പാകിസ്ഥാനിലെ പഞ്ചാബ് പ്രവിശ്യയില് ഈസ്റ്റര് ദിനത്തില് പുലര്ച്ചെ വിശ്വാസികള് നടത്തിയ പ്രദക്ഷിണത്തിലേക്ക് അതിവേഗത്തില് വന്ന ട്രക്ക് ഇടിച്ചുകയറി 60 പേര്ക്ക് പരിക്ക്. ഇതില് നാല് പേരുടെ നില അതീവ ഗുരുതരമാണ്. ഏപ്രില് 5 ഞായറാഴ്ച പുലര്ച്ചെ മൂന്ന് മണിയോടെ പഞ്ചാബ് പ്രവിശ്യയിലെ ഗുജ്രന്വാലയിലുള്ള വസീരാബാദ് റോഡിന് സമീപമാണ് ദാരുണമായ ഈ സംഭവം നടന്നത്.
സെന്റ് ഫ്രാന്സിസ് ഓഫ് അസീസി കാത്തലിക് ദൈവാലത്തിലേക്ക് ഇരുനൂറോളം വരുന്ന വിശ്വാസികള് മെഴുകുതിരികളുമായി ഗാനങ്ങള് ആലപിച്ച് നീങ്ങുമ്പോഴാണ് അപകടമുണ്ടായത്. അതിവേഗത്തില് വന്ന ട്രക്ക് വിശ്വാസികള്ക്കിടയിലേക്ക് പാഞ്ഞുകയറുകയായിരുന്നു. പ്രദക്ഷിണത്തിന് നേതൃത്വം നല്കിയ ഫാ. ഷാരൂഖ് നഥാനിയേല് സംഭവത്തെ അതിശക്തമായി അപലപിച്ചു. ഇത്രയധികം ആളുകള് പാട്ടുപാടിയും പടക്കം പൊട്ടിച്ചും നീങ്ങുന്ന ഒരു യാത്ര ഡ്രൈവര് കണ്ടില്ല എന്ന് വിശ്വസിക്കാന് പ്രയാസമാണെന്ന് ഫാ. ഷാരൂഖ് പറഞ്ഞു. മുന്വര്ഷങ്ങളില് ഇത്തരം പ്രഘോഷണങ്ങള്ക്ക് സുരക്ഷാ സേനയുടെ സംരക്ഷണം ലഭിക്കാറുണ്ടായിരുന്നുവെന്നും എന്നാല് ഇത്തവണ സുരക്ഷാ ഉദ്യോഗസ്ഥര് സ്ഥലത്തുണ്ടായിരുന്നില്ലെന്നും ഫാ. നഥാനിയേല് ചൂണ്ടിക്കാട്ടി.
സംഭവത്തില് പോലീസ് കേസെടുക്കുകയും ട്രക്ക് ഡ്രൈവറെ അറസ്റ്റ് ചെയ്യുകയും ചെയ്തിട്ടുണ്ട്. ഇതൊരു ആസൂത്രിത ആക്രമണമാണോ അതോ അശ്രദ്ധമായ ഡ്രൈവിംഗ് കൊണ്ടുണ്ടായതാണോ എന്ന് പോലീസ് അന്വേഷിച്ചുവരികയാണ്.
